Bahar E Baagh E Jannat Hai Bahaar E Rauza E Sabir

بہارِ باغِ جنت ہے بہارِ روضۂِ صابر

جوارِ عرش اعلیٰ ہے جوارِ روضۂ صابر

یہاں بے پردہ اللّٰہ و نبی کی دید ہوتی ہے

ہمیں مکہ مدینہ ہے دیارِ روضہ صابر

زمیں کلیر کی روضہ کی فضا پر ناز کرتی ہے

فلک ہوتا ہے پھر پھر کر نثارِ روضۂ صابر

یہاں ہر مردہ دل آکر حیات تازہ پاتا ہے

بہارِ جاوداں ہے ہمکنارِ روضہ صابر

رہے رنگیں چمن خونِ شہیدانِ محبت کا

سدا پھولے پھلے یہ لالہ زارِ روضۂ صابر

بناؤں غازۂِ رخسارِ ایماں خاک کلیر کی

مری آنکھوں کا سرمہ ہو غبارِ روضۂ صابر

تصور سے نظر میں کوندتی ہیں بجلیاں بیدم

عجب پرنور ہیں نقش و نگارِ روضہ صابر