Barson Ke Intezaar Ka Anjaam Likh Diya

برسوں کے انتظار کا انجام لکھ دیا

کاغذ پہ شام کاٹ کے پھر شام لکھ دیا

بکھری پڑی تھیں ٹوٹ کے کلیاں زمین پر

ترتیب دے کے میں نے تیرا نام لکھ دیا

آساں نہیں تھی ترکِ محبت کی داستاں

دو آنسوؤں نے آخری پیغام لکھ دیا

ہمکو کسی کے حسن نے شاعر بنا دیا

ہونٹوں کا نام لے نہ سکے، جام لکھ دیا

اللہ! زندگی سے کہاں تک نبھاؤں میں

جس بیوفا کے ساتھ میرا نام لکھ دیا

تقسیم ہو رہی تھیں خدائی کی نعمتیں

اک عشق بچ گیا سو میرے نام لکھ دیا

قیصر کسی کی دین ہے یہ شاعری میری

اسکی غزل پہ کس نے میرا نام لکھ دیا؟