Elahi Zindagi Yun Hi Basar Ho

الٰہی زندگی یوں ہی بسر ہو

نبی کا درد ہو میرا جگر ہو

میری آہوں میں بھی اتنا اثر ہو

یہاں تڑپوں مدینے میں خبر ہو

میرے مولا مجھے وہ دن دکھا دے

نبی کا آستاں ہو میرا سر ہو

چلا جاؤں غبارِ راہ بن کر

جو قسمت میں مدینے کا سفر ہو

غلاموں کی خبر رکھتے ہیں آقا

وہ آقا ہی نہیں جو بے خبر ہو

میری الفت مجھے کافر بنا دے

سوا تیرے کوئی دل میں اگر ہو

مجھے آقا عطا ایسی نظر ہو

میں دیکھوں جس طرف تو جلوہ گر ہو

مجھے کیا کام ہے دیر و حرم سے

میرا سجدہ ادھر ہے تو جدھر ہو

مجھے سارا جہاں اپنا کہے گا

میری جانب اگر تیری نظر ہو

سراپا بندگی وہ زندگی ہے

خیالِ مصطفیٰ میں جو بسر ہو

نہیں اس کے سوا کوئی تمنا

جب آئے موت تو پیشِ نظر ہو

یہی بس آرزو ہے یا الٰہی

جمالِ یار ہو میری نظر ہو

بلا لو آقا دیوانے کو در پر

یہ ہو کر آپ کا کیوں در بدر ہو

الٰہی زندگی یوں ہی بسر ہو

نبی کا درد ہو میرا جگر ہو