Humeñ Ab Dekhna He Hawsla

وہ بڑھتا سایۂ رحمت چلا زلفِ معنبر کا

ہمیں اب دیکھنا ہے حوصلہ خورشیدِ محشر کا

جو بے پردہ نظر آجاۓ جلوہ روئے انور کا

ذرا سا منہ نکل آۓ ابھی خورشیدِ خاور کا

شاہِ کوثر ترحم تشنہء دیدار جاتا ہے

نظر کا جام دے پردہ رخِ پرنور سے سر کا

ادب گاہست زیرِ آسماں عرش سے نازک تر

یہاں آتے ہیں یوں عرشی کہ آوازہ نہیں پر کا

ہماری سمت وہ مہرِ مدینہ مہرباں آیا

ابھی کھل جائیگا سب حوصلہ خورشیدِ محشر کا

چمک سکتا ہے تو چمکے مقابل ان کی طلعت کے

ہمیں بھی دیکھنا ہے حوصلہ خورشیدِ محشر کا

رواں ہو سلسبیلِ عشقِ سرور میرے سینے میں

نہ ہو پھر نار کا کچھ غم نہ ڈر خورشیدِ محشر کا

تیرا ذرہ وہ ہے جس نے کھلائے انگنت تارے

تیرا قطرہ وہ ہے جس سے ملا دھارہ سمندر کا

بتانا تھا کہ نیچر ان کے زیرِ پا مسخر ہے

بنا پتھر میں یوں نقشِ کفِ پا میرے سرور کا

وہ ظاہر کے بھی حاکم ہیں وہ باطن کے بھی سلطان ہیں

نرالا طورِ سلطانی ہے شاہوں کے سکندر کا

یہ سن لیں سایہِ جسمِ پیمبر ڈھونڈنے والے

بشر کی شکل میں دیگر ہے وہ پیکر پیمبر کا

وہ ظلِ ذاتِ رحماں ہیں نبوت کے مہِ تاباں

نہ ظل کا ظل کہیں دیکھا نہ سایہ ماہ و اختر کا