Ik Nazar Shahe Payambar Ik Nazar

زندگی ہے غفلتوں میں تر بتر

اک نظر شاہِ پیمبرؐ اک نظر

لؤ لگائیں چھوڑ کر تم کو کدھر

اک نظر شاہِ پیمبرؐ اک نظر

دل گناہوں کا پجاری ہو گیا

رنگِ دنیا ہم پہ طاری ہوگیا

نفس میں پھیلا گناہوں کا زہر

اک نظر شاہِ پیمبرؐ اک نظر

صبح ہوتی ہے گناہوں سے شروع

شام نافرمانیوں کے رو برو

جرم میں ڈوبا ہے اپنا ہر پہر

اک نظر شاہِ پیمبرؐ اک نظر

ہم طریقِ غیر میں مسرور ہیں

آپ کی سنت سے آقا دور ہیں

نہ رہا ہم میں غلامی کا اثر

اک نظر شاہِ پیمبرؐ اک نظر

تھے کبھی دریا مگر قطرہ ہوئے

چھوڑ کر دامن ترا رسوا ہوئے

لٹ رہا ہے خیمئہ عزّ و ظفر

اک نظر شاہِ پیمبرؐ اک نظر

نا شعورِ بندگی رکھتے ہیں ہم

نا بھلوں سی زندگی رکھتے ہیں ہم

ہے فقط ہم کو خطاؤں کا ہنر

اک نظر شاہِ پیمبرؐ اک نظر

رب کے بھیجے در پہ مجرم آئے ہیں

سن کے ”جاؤک“ کا مژدہ آئے ہیں

ظلم ہم نے کر لیا ہے نفس پر

اک نظر شاہِ پیمبرؐ اک نظر

آپ کا ہونے کا دم بھرتے رہے

بے وفائی پھر بھی ہم کرتے رہے

کیسے محشر میں ملائیں گے نظر

اک نظر شاہِ پیمبرؐ اک نظر

چاک ہے دامن گریباں تار تار

قصّہء غم کیا کہے یہ دل فگار

آپ سے یہ عرض ہے بس مختصر

اک نظر شاہِ پیمبرؐ اک نظر

آئیے آ جائیے آ جائیے

خواب میں اک دن کرم فرمایئے

کہہ رہا فیاض یہ خستہ جگر

اک نظر شاہِ پیمبرؐ اک نظر