Is Qadar Kaun Muhabbat Ka Sila Deta Hai

اس قدر کون محبت کا صلہ دیتا ہے

اس کا بندہ ہوں جو بندے کو خدا دیتا ہے

اس کے ارشاد سے مجھ پہ مرے اسرار کھلے

کہ وہ ہر لفظ میں آئینہ دکھا دیتا ہے

وہی سر سبز کرے گا مرے ویرانوں کو

آندھیوں کو بھی جو کردارِ صبا دیتا ہے

قدم اٹھتے ہیں مرے جانبِ بطحا جب بھی

اک فرشتہ مجھے شہپر کی ہوا دیتا ہے

قصر و ایوان سے گزر جاتا ہے چپ چاپ ندیمؔ

درِ محمدﷺ کا جب آئے تو صدا دیتا ہے