Madad Kar Meri Do Jahanon Ke Malik

مدد کر میری دو جہانوں کے مالک

مصیبت میں میں نے پکارا ہے تجھ کو

گناہوں کے دلدل میں میں پھنس گیا ہوں

نکلنے کی راہیں ہوئیں بند ساری

وہ نیا میری ڈوبتی جا رہی ہے

بچا لے اسے تو خداوندِ باری

کسی سے کوئی واسطہ ہی نہیں ہے

تیرا جب سے خالق سہارا ہے مجھ کو

مدد کر میری دو جہانوں کے مالک

مصیبت میں میں نے پکارا ہے تجھ کو

تیرا نام حی اور قیوم بھی ہے

تجھے نیند آتی نہیں ایک پل بھی

تو ہی تھامتا ہے زمین آسمان کو

ہوائیں بھی ہیں حکم سے تیرے چلتیں

مجھے تھام لے اور بچا لے مجھے تو

بہت دور لگتا کنارا ہے مجھ کو

مدد کر میری دو جہانوں کے مالک

مصیبت میں میں نے پکارا ہے تجھ کو

تو رازق ہے سب کا جہانوں کے مالک

زمین آسمان میں تیری بادشاہی

تو ہی بخشتا ہے دنوں کو اجالے

کہ راتوں کو دیتا ہے تو ہی سیاہی

کشادہ میرا رزق کر دے اے مالک

یہ کہنے کو دل نے ابھارا ہے مجھ کو

مدد کر میری دو جہانوں کے مالک

مصیبت میں میں نے پکارا ہے تجھ کو

تیری بندگی تو میری زندگی ہے

میری زندگی کا تو حاصل یہی ہے

میں سجدے پہ سجدہ کیے جا رہا ہوں

یہ گردن میری تیرے در پر جھکی ہے

قلم پھیر دے خود میری ہر خطا پر

میں مٹ جاؤں کیسے گوارا ہے مجھ کو

مدد کر میری دو جہانوں کے مالک

مصیبت میں میں نے پکارا ہے تجھ کو

تیرا نام ستار غفار بھی ہے

یہ بندہ تو عاجز گنہگار بھی ہے

الٰہی میرا سر ہے سجدے میں رکھا

زباں پر میری آج اقرار بھی ہے

زمانے سے منہ موڑ کر آ گیا ہوں

فقط ایک تیرا سہارا ہے مجھ کو

مدد کر میری دو جہانوں کے مالک

مصیبت میں میں نے پکارا ہے تجھ کو

میرے ہاتھ اٹھتے نہیں ہیں دعا کو

کبھی غیر کے در پہ جا کر خدایا

تو حاجت روا ہے تو مشکل کشا ہے

اسی بات پر تو میں ایمان لایا

ہر ایک شے ہے قبضۂ قدرت میں تیرے

یہ ایمان جاں سے بھی پیارا ہے مجھ کو

مدد کر میری دو جہانوں کے مالک

مصیبت میں میں نے پکارا ہے تجھ کو