Manqabat Mufassir e Azam Hind (2)

کس کے غم میں ہائے تڑپاتا ہے دل

اور کچھ زیادہ امنڈ آتا ہے دل

دل تیرا ہر گز بہکنے کا نہیں

تو ابس بیمار بہلاتا ہے دل

ہائے دل کا آسرا ہی چل بسا

ٹکڑے ٹکڑے اب ہوا جاتا ہے دل

کون جانے رازِ محبوب و محب

کیوں لیا جاتا دیا جاتا ہے دل

جاں بہ حق تسلیم ہو جانا تیرا

یاد کر کے میرا بھر آتا ہے دل

اے تعالیٰ اللہ شانِ اولیاء

ان کے استغنا پہ بل کھاتا ہے دل

میں بھی ہوں کچھ دن کا مہمانِ جہاں

تابِ ہجراں اب نہیں لاتا ہے دل

کھا چکا ہے بارہا کتنے فریب

پھر بھی دنیا پر مٹا جاتا ہے دل

تیرے پیچھے ہو چکا برباد میں

رہنے دے اب اور کیا بھاتا ہے دل

چھوڑ دے ہاں اور غفلت چھوڑ دے

کیوں سوئے دوزخ لیے جاتا ہے دل

اپنے مولیٰ کو منا لے بد نصیب

ٹھوکریں در در کی کیوں کھاتا ہے دل

اپنے اختر پر عنایت کیجیے

میرے مولیٰ اس کو بہکاتا ہے دل