Qasam Khuda Ki Shaha Kamiyaab Ho Jaa-uñ

تمھارے در پہ جو میں باریاب ہو جاؤں

قسم خدا کی شہا کامیاب ہو جاؤں

جو پاؤں بوسۂ پاے حضور کیا کہنا

میں ذرہ شمس و قمر کا جواب ہو جاؤں

میری حقیقتِ فانی بھی کچھ حقیقت ہے

مروں تو آج خیال اور خواب ہو جاؤں

جہاں کے قوسِ قزح سے فریب کھائے کیوں

میں اپنے قلب و نظر کا حجاب ہو جاؤں

جہاں کی بگڑی اسی آستاں پہ بنتی ہے

میں کیوں نہ وقفِ در آں جناب ہو جاؤں

تمھارا نام لیا ہے تلاطمِ غم میں

میں اب تو پار رسالت مآب ہو جاؤں

یہ میری دوری بدل جائے قرب سے اختر

اگر وہ چاہیں تو میں باریاب ہو جاؤں