Shauq e Deedar Mein Ab Jee Pe Mere Aan Bani

شوقِ دیدار میں اب جی پہ مرے آن بنی

ارنی انت حبیبی شہِ مکی مدنی

خاتمِ جملہ رُسُل شمعِ سُبُل مصدر کل

نخلِ بُستانِ عرب سروِ ریاضِ مدنی

کششِ عشقِ نبی صلی علیٰ صلی علیٰ

مرحبا جذبۂ بےتاب و غریب الوطنی

کیوں نہ روضے کو ترے نورٌ علیٰ نور کہوں

قُبَّۂِ نور پے ہے چادرِ مہتاب تنی

موتی دندان مبارک کی چمک پر صدقے

لبِ رنگیں پہ ہے قربان عقیقِ یمنی

ہندی محتاج کو محروم نہ رکھیے سرکار

اے شہنشاہِ عرب یثرب و بطحا کے دھنی

سب کی سنتے ہیں تو تیری بھی سنیں گے بیدم

رائیگاں جا نہیں سکتی یہ کبھی نعرہ زنی