Zubaan Par Jab Bhi Naam-E-Ahmad-E-Mukhtaar Aata Hai

زُباں پر جب بھی نامِ احمدِ مختارؐ آتا ہے

زَمیں کا ذَرّہ ذَرّہ وَجد میں ہر بار آتا ہے

مُحَبّت اشک بن کر چشمِ مُضطَر سے ٹَپکتی ہے

پَسِ پردہ جو عالَم ہے بَرُوعِ کار آتا ہے

خُدا رکھے مدینے کو، مدینہ ایسی بَستی ہے

مُجھے ساقی تو ساقی، مَیکَدے پر پیار آتا ہے

نہ دِل کا ہوش رہتا ہے نہ جاں کی فِکر رہتی ہے

وہاں جو بھی پَہُنچ جائے وہی سرشار آتا ہے

مَے حُبِّ محمدؐ پِینے والوں کے یہ رُتبے ہیں

قِیامَت میں اُٹھیں گی اُنگلیاں، مَے خوار آتا ہے

اِلٰہی ‘راز’ؔ کا رازِ نِہاں یوں آشکارا ہو

کہے عالَم غلامِ احمدِ مختارؐ آتا ہے